ജപ്പാനിലെ ഐച്ചി നാഗോയ ഏഷ്യന്‍ ഗെയിംസില്‍ രണ്ട് സ്വര്‍ണവും ഒരു വെള്ളിയും ഉള്‍പ്പെടെ മൂന്ന് മെഡലുകള്‍ സ്വന്തമാക്കിയ ഇന്ത്യന്‍ ട്രാപ്പ് ഷൂട്ടര്‍ നീരു ദണ്ഡ, തന്റെ മൂന്ന് മെഡലുകളും ഇന്ത്യന്‍ ആര്‍മിക്ക് സമര്‍പ്പിച്ചു. രാജ്യത്തിന് തുടര്‍ന്നും അഭിമാനം സമ്മാനിക്കാന്‍ കഴിയുമെന്നും നീരു പ്രത്യാശ പ്രകടിപ്പിച്ചു.ഇന്ത്യന്‍ ആര്‍മിയില്‍ നായിബ് സുബേദാറായി സേവനമനുഷ്ഠിക്കുന്ന നീരു ദണ്ഡ, ഏഷ്യന്‍ ഗെയിംസില്‍ ഇന്ത്യയുടെ ഏറ്റവും വിജയകരമായ മുന്നേറ്റങ്ങളിലൊന്നാണ് സമ്മാനിച്ചത്. വനിതകളുടെ ഇന്‍ഡിവിജ്വല്‍ ട്രാപ്പ് ഇനത്തില്‍ 26 സ്‌കോറോടെ ഒന്നാമതെത്തി, ഏഷ്യന്‍ ഗെയിംസ് ട്രാപ്പ് ഷൂട്ടിംഗില്‍ വ്യക്തിഗത സ്വര്‍ണം നേടുന്ന ആദ്യ ഇന്ത്യന്‍ വനിതയായി അവര്‍ ചരിത്രം കുറിച്ചു.
വ്യക്തിഗത സ്വര്‍ണ്ണത്തിന് പിന്നാലെ, ആഷിമ അഹ്ലാവത്, മനീഷ കീര്‍ എന്നിവര്‍ക്കൊപ്പം വനിതാ ടീം ട്രാപ്പ് ഇനത്തില്‍ വെള്ളി മെഡലും നീരു നേടി. തുടര്‍ന്ന്, മിക്‌സഡ് ടീം ട്രാപ്പ് ഇനത്തില്‍ കൈനന്‍ ചെനായ്ക്കൊപ്പം സ്വര്‍ണ്ണം നേടി മൂന്ന് മെഡലുകളുടെ തിളക്കമാര്‍ന്ന നേട്ടം അവര്‍ പൂര്‍ത്തിയാക്കി.
2026 ഏഷ്യന്‍ ഗെയിംസില്‍ പങ്കെടുത്ത ഇന്ത്യന്‍ ആര്‍മി കായികതാരങ്ങളെ കരസേനാ മേധാവി ജനറല്‍ ധീരജ് സേഥ് സന്ദര്‍ശിക്കുകയും ആദരിക്കുകയും ചെയ്ത ചടങ്ങില്‍ സംസാരിക്കവേ, തനിക്ക് ലഭിച്ച ആദരവിനും ബഹുമാനത്തിനും നീരു ദണ്ഡ ഇന്ത്യന്‍ ആര്‍മിക്കും രാജ്യത്തിനും നന്ദി അറിയിച്ചു. ജീവിതകാലം മുഴുവന്‍ ഇത് കാത്തുസൂക്ഷിക്കുമെന്നും ജനങ്ങളുടെ സ്‌നേഹവും പ്രാര്‍ഥനയും തുടര്‍ന്നും ലഭിക്കുമെന്ന് പ്രതീക്ഷിക്കുന്നതായും അവര്‍ പറഞ്ഞു.
'എന്റെ ആര്‍മിയും രാജ്യവും എനിക്ക് നല്‍കിയ ബഹുമാനവും ആദരവും ജീവിതകാലം മുഴുവന്‍ ഞാന്‍ നെഞ്ചിലേറ്റും. എന്റെ രാജ്യത്തിനും ഇന്ത്യന്‍ ആര്‍മിക്കും വേണ്ടി ഞാന്‍ പോരാടും. ഈ സ്‌നേഹവും പ്രാര്‍ത്ഥനകളും തുടര്‍ന്നും ലഭിക്കുമെന്ന് ഞാന്‍ പ്രതീക്ഷിക്കുന്നു. എന്റെ ഹൃദയത്തിന്റെ അടിത്തട്ടില്‍ നിന്ന് ഞാന്‍ വളരെ സന്തോഷവതിയാണ്, ഇവിടെ ലഭിച്ച എല്ലാ ആദരവിനും ഞാന്‍ വളരെയധികം നന്ദിയുള്ളവളാണ്' നീരു പറഞ്ഞു.
രാജ്യത്തെ സംരക്ഷിക്കുന്ന ഇന്ത്യന്‍ ആര്‍മിക്കും സൈനികര്‍ക്കും, അവരുടെയും കുടുംബങ്ങളുടെയും ത്യാഗങ്ങളെ സ്മരിച്ചുകൊണ്ട് നീരു തന്റെ മൂന്ന് ഏഷ്യന്‍ ഗെയിംസ് മെഡലുകളും സമര്‍പ്പിച്ചു. 'എന്റെ ഈ മെഡല്‍ ഞാന്‍ ഇന്ത്യന്‍ ആര്‍മിക്കും, അതിര്‍ത്തിയില്‍ രാജ്യത്തെ സംരക്ഷിക്കവേ ജീവന്‍ വെടിയുന്ന നമ്മുടെ രാജ്യത്തെ ധീരരായ ജവാന്മാര്‍ക്കും സമര്‍പ്പിക്കുന്നു. എന്റെ മൂന്ന് മെഡലുകളും ഞാന്‍ അവര്‍ക്കാണ് സമര്‍പ്പിക്കുന്നത്. രാജ്യത്തോടുള്ള അവരുടെ ഉറച്ച നിശ്ചയദാര്‍ഢ്യവും ജീവന്‍ നല്‍കുന്ന പരമോന്നത ത്യാഗവും ചെറിയ കാര്യമല്ല. അവര്‍ക്കും കുടുംബങ്ങളുണ്ട്. നമ്മുടെ രാജ്യത്തെ സംരക്ഷിക്കാന്‍ അവര്‍ തങ്ങളുടെ സകലതും ഉപേക്ഷിക്കുന്നു' അവര്‍ പറഞ്ഞു.
നവംബര്‍ 1 മുതല്‍ 15 വരെ നടക്കാനിരിക്കുന്ന ലോക ചാമ്പ്യന്‍ഷിപ്പാണ് തന്റെ അടുത്ത ലക്ഷ്യമെന്നും, അതില്‍ ഒളിമ്പിക് ക്വാട്ട മത്സരങ്ങള്‍ ഉള്‍പ്പെടുന്നുണ്ടെന്നും, തുടര്‍ന്ന് 2028 ലോസ് ഏഞ്ചലസ് ഒളിമ്പിക്‌സാണ് ലക്ഷ്യമെന്നും നീരു കൂട്ടിച്ചേര്‍ത്തു. 'നവംബര്‍ 1 മുതല്‍ 15 വരെയുള്ള ലോക ചാമ്പ്യന്‍ഷിപ്പാണ് അടുത്ത ലക്ഷ്യം, അതില്‍ ഒരു ക്വാട്ട മത്സരവുമുണ്ട്. അടുത്ത ലക്ഷ്യവും, ഓരോ കായികതാരത്തിനുമുള്ള വലിയ സ്വപ്നവും 2028-ലെ ലോസ് ഏഞ്ചലസ് ഒളിമ്പിക്‌സാണ്' അവര്‍ പറഞ്ഞു.
ഇന്ത്യന്‍ ആര്‍മിയില്‍ ഹവില്‍ദാറായി സേവനമനുഷ്ഠിക്കുന്ന മറ്റൊരു ഇന്ത്യന്‍ ഷൂട്ടറായ കമല്‍ജീതും സ്വര്‍ണമെഡല്‍ കരസ്ഥമാക്കി. ഏഷ്യന്‍ ഗെയിംസില്‍ സുരുചി സിംഗിനൊപ്പം 10 മീറ്റര്‍ എയര്‍ പിസ്റ്റള്‍ മിക്‌സഡ് ടീം ഇനത്തിലാണ് അദ്ദേഹം സ്വര്‍ണം നേടിയത്. തനിക്ക് ലഭിച്ച സ്വീകരണത്തിന് കമല്‍ജീതും ഇന്ത്യന്‍ ആര്‍മിയോട് നന്ദി അറിയിക്കുകയും രാജ്യത്തിനും ആര്‍മിക്കും വേണ്ടി മെഡല്‍ നേടാനായതില്‍ ഭാഗ്യവാനാണെന്ന് പറയുകയും ചെയ്തു. 'ഞാന്‍ ആര്‍മിക്ക് വളരെ നന്ദി പറയാന്‍ ആഗ്രഹിക്കുന്നു. രാജ്യത്തിന് വേണ്ടി മെഡല്‍ നേടാന്‍ കഴിഞ്ഞതിലും ആര്‍മി എന്നെ ഇതുപോലെ സ്വീകരിച്ചതിലും ഞാന്‍ വളരെ വളരെയധികം കടപ്പെട്ടിരിക്കുന്നു' -അദ്ദേഹം പറഞ്ഞു. വരാനിരിക്കുന്ന ലോക ചാമ്പ്യന്‍ഷിപ്പിലേക്ക് തന്റെ ശ്രദ്ധ മാറ്റുമെന്നും, ഇന്ത്യയ്ക്കായി ഒളിമ്പിക് ക്വാട്ട ഉറപ്പാക്കി 2028 ഒളിമ്പിക്‌സില്‍ രാജ്യത്തെ പ്രതിനിധീകരിക്കുകയാണ് ലക്ഷ്യമെന്നും കമല്‍ജീത് പറഞ്ഞു.'ഏഷ്യന്‍ ഗെയിംസില്‍ ഞാന്‍ സ്വര്‍ണമെഡല്‍ നേടി, എന്നാല്‍ ഏതാനും ദിവസങ്ങള്‍ക്കുള്ളില്‍ എനിക്ക് അത് മാറ്റിവെക്കേണ്ടി വരും, കാരണം അടുത്തതായി ലോക ചാമ്പ്യന്‍ഷിപ്പ് വരികയാണ്. ഈ മത്സരം ഒളിമ്പിക് ക്വാട്ട വാഗ്ദാനം ചെയ്യുന്നു, അതിനാല്‍ ഇന്ത്യയ്ക്കായി ക്വാട്ട ഉറപ്പാക്കാനും ഒളിമ്പിക്‌സില്‍ രാജ്യത്തെ പ്രതിനിധീകരിക്കാനും ഞാന്‍ പരമാവധി ശ്രമിക്കും' -അദ്ദേഹം വ്യക്തമാക്കി.
content highlights: 'This Achievement is Dedicated to Indian Soldiers': Niru Dhanda Dedicates Historic Win to Armed Forces